خانه / تفسیر / نه‌دن میلّی سیمگه‌لر هدف سئچیلیر؟- محمدرضا هیئت

نه‌دن میلّی سیمگه‌لر هدف سئچیلیر؟- محمدرضا هیئت

T.Sایراندا تورکلری فارسلاشدیرما آماجی ایله بوگونه قدر ایشله‌دیلن یؤنتملر ترس نتیجه وئرمگه باشلایینجا، یئنی یؤنتملر اویقولامایا گیردی. بو یؤنتملردن بیری ده میلی سیمگه‌لری قوللاناراق، تورکچولوک حرکتی‌نین یؤنونو دگیشدیرمگه چالیشماق و میلی پالتار ایچینده تورک دوشمنلیگینی سوردورمکدیر. بو یؤنتمده، حرکت منسوبلاری آراسیندا سیمگه‌لشمیش اولان دگرلر دقتله سئچیلیر و اونلاری دگرسیزلشدیرمک اوچون عینی آد و یا بنزر آدلارلا پارالل حرکتلر باشلاییر. تورکچو سؤیلملرین تورکچو اولمایانلار طرفیندن صاحیبلنمه‌سی ده بونون ان باریز تظاهرلریندندیر.

تورکلوک بیلینجی‌نین باشدا گونئی آذربایجان اولماق اوزره تورکلرین یاشادیغی بوتون بؤلگه‌لرده آرتماسی و اویانیشین دالغا- دالغا گئنیشله‌مه‌سی سونوجوندا هر گئچن گون داها دا گوجلو حالا گلن تورکلوک حرکتی‌نین اؤنو کسیله‌بیلمه‌دیگی اوچون، اونون ان آزیندان کونترول آلتینا آلینماسی و بللی مرکزلر طرفیندن یؤنلندیریلمه‌سی آماجی ایله، اؤزللیکله سون دؤنملرده قارشیمیزا چیخان پارالل حرکتلرین ساییسی گئتدیکجه آرتماقدادیر.

بونلاردان بیری و بلکه ده ان اؤنملیسی مجلیس‌ده تورک فراکسیونو آدی ایله اورتایا چیخان و عملده هئچ بیر یارارلی فونکسیونو اولمایان اولوشومدور. بو اولوشومون آدی دیشیندا ایندییه قدر هئچ بیر ائتکیلی و یارارلی فعالیتی اولمامیش و بو دؤنمده حاقسیزلیقلار، توتوقلامالار و تورک دوشمنلیگی اسکیسیندن داها آغیر بیر شکیلده داوام ائتمیش، وئریلن سؤزلر حیاتا گئچیریلمه‌میشدیر.

تورک دیلی آکادمیسی وعده‌سی‌نین بیر آندا جیدّی دگیشیکلیگه اوغرایاراق “آذربایجان کولتور و صنعت قورومو” آدی آلتیندا ایشله‌وسیز بیر قورولوش حالینا گلمه‌سی، تورک دیلی و کولتورو اوچون آیریلماسی گرکن بودجه‌نین بو طرز ایچی بوش فعالیتلره خرجلنمه‌سی، ایچی تورکلوکدن بوشالدیلمیش بیر آذربایجان ایماژی‌نین وئریلمگه چالیشیلماسی دا پاراللجی حرکتین بیر باشقا اؤرنگی‌دیر.

زنجاندا مکتب اوشاقلارینا یؤنه‌لیک دقتله و ایرانین شرطلرینه اویغون بیر شکیلده حاضیرلانان تورکجه درس کیتابی‌نین یایینلاناجاغی و اوخودولاجاغی خبرینه سئوینیرکن، بو کیتابین اگیتیم باخانلیغی طرفیندن اونایلانمادیغی خبری ایله خیال قیریقلیغینا اوغرادیق.

وارلیق درگیسی‌نین کونترول آلتینا آلینماسی پروژه‌سی سونوج وئرمگینجه، عینی آد و عینی لوقو ایله یئنی بیر درگی‌نین نشرینه درحال ایذین وئریلمه‌سی، سیمگه‌لشمیش اولان “وارلیق” سؤزونون صمیمی اولمایان نیّتلر اوچون قوللانیلماسی دا پارالل حرکتین بیر باشقا اؤنملی اؤرنگی‌دیر. سون گونلرده دؤرد تورک آکتیویستین توپلامدا 45 ایل حبس جزاسینا چاپدیریلماسی‌ ایله سونوجلانان ادعانامه‌ده وارلیق درگیسی‌نین ابدی صاحیبی پروفسور دوکتور جواد هیئت‌‌دن “تمجید ائتمک”ین سوچ ساییلدیغی بیر اورتامدا، اونون چیخاردیغی درگی‌نین آدی ایله باشقا بیر درگییه ایذین وئریلمه‌سی، پارالل دئییل ده نه‌دیر؟

مشهور “آذری‌ها” سایتی‌نین یان قولو اولان “آنا خبر” سایتی دا میلی حرکتین ان چوخ ایشلتدیگی “آنا” سؤزونو صاحیبلنه‌رک، تورکلوک پالتاری گئییندیرمه‌سی‌نین اساس آماجی یئنه سیمگه و دگرلریمیزی اعتیبارسیزلاشدیرماقدان باشقا بیر شئی دئییلدیر.

بو اؤرنکلری آرتیرماق مومکوندور. آنجاق آشاغیدا گؤستره‌جگیم سون اؤرنک هامیسیندان داها ماراقلی‌دیر.

شبهه‌سیز حرکتین ان سیمگه‌لشمیش شعارلاریندان بیری “هارای هارای من تورکم” شعاری‌دیر. مشکین‌شهرده یایینلانان “هارای” آدلی قزئته‌نین 19-جو ساییسینی اینجه‌لرکن، داوود طبیب‌زاده آدلی بیر یازارین “تورکجه و آذریجه عینی دیل می؟” آدلی یازیسیندا (آیا ترکی و آذری یک زبان هستند؟) “آذربایجانلیلارین تورک اولمادیقلاری، شاه اسماعیل زامانینا قدر اهالی‌نین هامیسی‌نین اصیل ایرانی بیر لهجه اولان آذریجه دانیشدیقلاری” جمله‌لرینی اوخویونجا بو قزئته‌یه نه‌دن “هارای” آدی سئچیلدیگینی آنلامیش اولدوم.

سونوج بو کی، بیر میلّتین وار اولماسی و وارلیغینی سوردوره‌بیلمه‌سی اوچون میلّی سیمگه و دگرلرینه صاحیب چیخماسی و اونلاری قوروماسی ان اؤنملی وظیفه‌لردن بیری‌دیر.

….

یازار: محمدرضا هیئت

این متن را به اشتراک بگذارید

همچنین بررسی کنید

بیزیم بوش کوچه‌لرین لاتلاری و زیندشتی‌لر- بابک شاهد

ایران انقلابینا قدر ایران توپلومونون اؤزه‌للیکله ده محله‌لر چاپیندا توپلومسال یاشامین آکتورلریندن بیری محله لوتولاری …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *