خانه / اسلایدر اصلی / بیزیم بوش کوچه‌لرین لاتلاری و زیندشتی‌لر- بابک شاهد

بیزیم بوش کوچه‌لرین لاتلاری و زیندشتی‌لر- بابک شاهد

ایران انقلابینا قدر ایران توپلومونون اؤزه‌للیکله ده محله‌لر چاپیندا توپلومسال یاشامین آکتورلریندن بیری محله لوتولاری ایدی. بو محله لوتولاری گئنللیکله بیرجور آغ‌ساققال رولونو اوینایبب چوخ زامان گوونلیک گوجلری و حقوق سیستمی طرفیندن چؤزوله‌مه‌ین بعضی سورونلاری محله‌ده اؤز آرالاریندا چؤزمه‌یه چالیشیردیلار. بو لوتولاری دیگر توپلومسال گروهلارلا فرقلندیرن ان اؤنملی اؤزه‌للیکلری گوجلونون قارشیسیندا ضعیفی قوروماق و ظلمه اوغرایان بیر انسانین حقینی آلماغا چالیشمالاری اولموشدور. بو لوتولارین قارشیسیندا لاتلار دوروردو. انقلابدان سونرا لوتولوق آرادان گئتسه ده لاتلار آرادان گئتمه‌ییب گوندن گونه گوجلو موقعیته گلدیکلری گؤرونور. لاتلار اؤزلرینی لوتو کیمی گؤسترمک ایسته‌سه‌لر ده لوتولارین عکسینه ضعیف بیر انسان گؤرنده دانقالیق ائدیب گوجلو گؤرنده ایسه قویروق بولاماقدان باشقا بیر شئی ائده‌مزلر. هله بو لاتلار ایچینده ﺃن قورخاقلاری بوش کوچه لاتلاریدیر. بوش کوچه لاتلاری بوش بیر کوچه‌ده و هئچ بیر انسانین اولمادیغی یئرده باغیریب چیغیرمایی باشاریرلار آنجاق گوجلری ساده‌جه ائو ایچینده اؤز عائله‌لری، اوشاقلاری و ائشلرینه چاتار و ائوین ائشیگینده قویروق بولایانلارین اؤنده گئدنلری اولسالار دا ساده‌جه ائوین ایچنیده‌کیلری اذیت ائده‌بیلرلر.

سون هفته‌لرده مخدر ماده‌لر قاچاقچیسی ناجی شریف زیندشتی‌نین غربی آذربایجان‌داکی شبکه‌سینین گوجو و الینده سلاحلی انسانلارلا راحات بیر شکیلده گزمه‌سی اوزرینه چئشیدلی یازیلار قلمه آلینیب چئشیدلی خبرلر یاییلدی. فقط بورادا ﺃن گؤزه چارپان مسئله ایران دؤلت ایله اولان ایلیشگیسی، کورد اؤرگوتلرله ارتباطی و مافیابازلیق اویونلارینی گونئی آذربایجان توپراقلارینا چکمسه ایدی. بیر دؤلتین ان اؤنملی گؤره‌وی ائو ایچینده‌کی اولان وطنداشلارینی قوروماق و اونلارا پیسخولوژیک گوون باشدا اولماق اوزره چئشیدلی گووه‌نلر ساغلاماقدیر. بیر دؤلت وطنداشلارینین سیغینماسی یئر اولماسی گره‌کیرکن حقوقو هئچه سایانلار اوچون جزایی کسن بیر آراج اولمالیدیر. تاسفله بوگون ایران‌ین چئشیدلی بؤلگه‌لری و گونئی آذربایجان‌ین مختلف شهرلرینه باخدیغیمیزدا اونلارجا و بلکه ده یوزلرجه زیندشتی کیمیلرینین اوره‌دیگینی گؤره بیلیریک. بیر حالدا کی سؤزونو چاتدیرماق و انسان اولاراق اؤز وارلیغینین واراولوشونا آنلام وئرن دوشونجه‌لری ابراز ائتمک اوچون  قلمیندن، هنریندن و دوشونجه‌سیندن باشقا بیر آراجی اولمایانلار ایران دؤلتی طرفیندن آغیر باسقیلارا و ظلملره معروض قالیرکن زیندشتی کیمی لاتلیق گله‌نه‌یینین دوامجیلارینین بیزیم کوچه‌لرده بوی گؤستره بیلمه‌سی ﺃن چوخ بیزیم سؤزده تورک مسئوللاریمیزین سوچودور. بیر دؤلتین ﺃن اؤنملی اولوسال گوونجه‌سی توپلومون اونا اولان گوو‌نیدیر و بو گوون ساده‌جه حقوقون اوستونلویو و حقوق سیستئمینین دوغرو چالیشماسی ایله ممکن اولابیلر. بوگون زیندشتی و زیندشتی کیمیلرینین بیزیم توپراقلاردا ساچما ساپان سریاللار کیمی گزه‌بیلمه‌سی اصلینده اؤزلرینی دؤلت بیلن بیزیم مسئولاری بوش کوچه لاتلار موقعینه دوشورور. هله دؤلت ایله ارتباطی و دؤلتین بو جور انسانلارا گوونمه‌سی توجیهی اولمایان بیر فلاکتدیر. بیر طرفدن زیندشتی و زیندشتی کیمیلرینین بیزیم توپراقلاردا گوج صاحیبی اولوب بارینابیلمه‌سی و اؤته طرفدن ده سؤز، قلم و دوشونجه‌سی اوچون باسقییا معروض قالانلارین اولماسی آیریجا حقلرینی آلامادیقلاری اوچون اعتراضدان باشقا چاره‌لری قالمایان ایشچیلر، اؤیرتمنلر و مختلف اقتصادی-توپلومسال گروهلارین اولماسی و سسلرینی بیر یئره چاتدیرا بیلمه‌مه‌لری دؤلت دئیه بیر شئیین قالمادیغینی و اؤزلرینی دؤلت بیلنلرین بوش کوچه لاتلاریندان باشقا بیر شئی اولمادیقلارینی گؤستریر. هله بو ذهنیتین یایقینلاشماسی‌نین توپلومسال آچیدان اؤنملی سونوچلاریندان بیری توپلوم پیسخولوژسینده یول آچابیله‌جه‌گی توپلومسوزلاشما سورونودور. یعنی دؤلتده‌کی بو اخلاقی چؤکوش توپلوما دا یانسییاراق توپلوم اولماغا آنلام وئرن توپلومسال قرارداد یئرینی قارماشیق چیخار ایلیشگیلری ایله بیربیرینه باغلی اولان مافیاواری شبکه‌لنمه‌یه وئره‌جکدیر و ایران‌ین بوگونکو دورومونا باخدیغیمیزدا دؤلت ایله ایلیشگیسینی ساده‌جه شبکه‌سل و گروهی چیخار اوزه‌رینه تمللندیرن مختلف گروهلارین یایقینلاشدیغی گرچه‎یی بو ذهنیتین توپلوما دا نفوذ ائتدیگینی گؤسترمکده‌دیر. نئجه کی موجود دورومدا توپلومداکی بیر چوخ رقابتین تملینده بو مافیاواری شبکه‌لرین چیخار رقابتی واردیر. نه یازیق کی بو دورومون ﺃن بؤیوک اودوزانی توپلوم و توپلوما آنلام وئرن فرد اولما گرچه‌یی اولاجاقدیر و بیر توپلوم کی گئچمیشینده‌کی کولتور، ادبیات، فلسفه، موسیقی، هنر، ظلمه قارشی دورما، عدالت مجادله‌سی و اؤزگورلوک خیالی ایله غرور دویابیلر و چاغداش و آیدین بیر گله‌جک اوچون خیاللار قورابیلر، چانتالاریندا و ایچلرینده هئچ بیر شئی اولمادان فقط دؤلت رانتی ایله دانقالیق ائده‌بیلن گروهلار و انسانلار قارشیسیندا ازیلمیش انسان ییغینینا دؤنوشر. بو توپلومسال کولتورون ده اورتایا چیخارتدیغی انسان نوعلاری، ﺃن یاخشی احتمال ایله گونده‌لیک اؤز یاشامینی سوردوره‌بیلمک اوچون مجادله ائدن انسان و ﺃن پیس احتمالی ایله اؤنونه قورو بیر چؤرک آتان هرهانسی بیر کسین قارشیسیندا بویون اینلر اولور.

بابک شاهد- تبریز آراشدیرمالاری مرکزی اوزمانی

این متن را به اشتراک بگذارید

همچنین بررسی کنید

بیانیه‌ی جمعی از فعالین ملی و مدنی ترک-آذربایجانی : قاراباغ خاک آذربایجان است.

طی روزهای اخیر ارتش جمهوری آذربایجان در پاسخ به تجاوزات متناوب ارتش ارمنستان به خاک …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *