خانه / موضوعات / فرهنگ / حسن بگ دمیرچی‌‌نین آردینجا…- ماناس چاملی

حسن بگ دمیرچی‌‌نین آردینجا…- ماناس چاملی

بو سطیرلری یازدیغیم ساعاتلاردا حسن بی دمیرچی(آذربایجان) گونئی آذربایجانین باشکندی ساییلان قوجا تبریزده سئونلری طرفیندن سون یولجولوغونا اوغورلانماق اوزره‌دیر. حسن بی دمیرچی‌‌نی بوردا تانیماق و یا اؤومک کیمی بیر آماجیم یوخدور چونکو اونون بونا احتیاجی یوخدور. بو قیسسا یازی دا حسن بی آذربایجان ایله یاخیندان گؤروشدویوم چئشیدلی دؤنملرده کیشلیگیندن درین ائتگیلندیگیم و سایغی دویدوغوم یانلارینا قیسا اشاره ائتدیکدن سونرا اونون آذربایجان میللی حرکتینده اؤنملی یئرینه و بو حساس دؤنمده اونون آرامیزدان گئتمه‌سینین نه درجه ده بؤیوک بیر ایتگی اولماسینی آنلاماق اوچون چالیشاجاغام.

گئرچکدن اوستاد سؤزونون نه درجه حسن بگین آدینا یاراشدیغی دارتیشیلمازدیر. آنجاق بو سایغی ساده‌جه اونون آذربایجان موسیقی‌سی ساحه‌سینده اوستالیغی و باشاریسی سایه‌سینده اولمامیشدیر. او بیر یاندان دا بو ساحه‌ده بایراقدار ایدی، بیر چوخ دؤنمده تک باشینا بو بایراغی داشیدی.

هر حالدا اوستادلا یاخیندان ایلک تانیشدیغیم ایگیرمی بئش ایل اؤنجه‌یه قاییدیر. تبریزین منظریه محله‌سینده یئرلشن اوستادین ائوینه بایرامین ایلک و یا ایکینجی گونونده بایرام گؤروشو اوچون بیرسیرا دوستلارلا گئتدیگیمیزده اوستادلا تانیشدیم. آنجاق بیر شؤلن هاواسیندا گئچن، آذربایجان موسیقی‌سی و کؤلتورونون یاشاندیغی بو ائوده، باغریندا تاری ایله و چئوره‌سینده اؤیرنجی‌لری و دوستلاری ایله حیاتا و اؤزو کیمی موسیقی و کولتورسئورلره سونسوز بیر سئوگی بسله‌ین حسن آغا دمیرچی، قوشقوسوز اؤز نسلینین سون نماینده‌لریندن دیر. بوتون اولومسوزلوقلارا و یاساقلارا باخمایاراق آذربایجان موسیقی‌سینی و زنگین کولتورونو هر یئرده و هر نه اولورسا اولسون بیر فدایی کیمی یاشاتماغا و سسلندیرمگه بؤیوک اؤزوئریله چالیشان اوستاد شبهه‌سیز توم چئوره‌لرین سونسوز سایغی‌سینی قازانمیشدیر. سونسوز زحمتلرله قوردوغو آذربایجان موسیقی اوخولو دفعه‌لرله ایران اسلام جمهوریتی طرفیندن باغلانمیش، اؤزو ایسه سون درجه مدنی و باریشجیل اولان کولتورل و انسانجیل فعالیتلری اوچون حاقسیز یئره توتوقلانمیش و اذیت گؤرموش، آنجاق محکم اینامی داها دا محکم‌لشمیشدی.

 اونودولماز عالیمیمیز دوقتور فرزانه‌نین حیاتینی دگیشدیگی دؤنمده تبریزده دوزنله‌نن اؤزه‌ل بیر آغیرلاما و یاس تؤرنینده بیر آرایا گلمیشدیک. موسیقی و شعیرین یانی سیرا دوقتور فرزانه حاقدا دانیشیقلار و خاطیره‌لر سؤیلنیردی. قیسسا دا اولسا فرزانه حاقدا بیر نئچه کلمه سؤیلمه شانسیم اولدو آنجاق او مراسیمده هئچ بیر زامان اونودابیلمه‌یه‌جگیم، شاعیر بیر دوستوموز طرفیندن اوخونان قارامسار بیر شعیرین آردینجا حسن آغانین اینجه اعتراضی‌ایدی. یاشادیغیمیز دورومو، حقیقی یاشامین بیر یامسیلاماسی اولاراق دگرلندیرن شاعیر دوستوموزون یاشاما بو دنلی قارامسار باخیشی قارشیسیندا، اوستادین اعتراضی هم دوشوندوروجو همده اومید دولوسویدو. او هر دورومدا بوتون اولومسوزلوقلارا باخمایاراق حایاتین دولو دولو یاشانماسی گرکتیگینین آلتینی چیزه‌‌رک یامسیلانان حایاتلار قاورامینا اینجه اعتراضینی دیله گتیردی. بوتون فعالیت‌لرینده تورک گنجلری و گنجلیگینی دوشونن اوستاد، قوشقوسوز اومید فاکتورونون گنج نسیللریمیز اوچون نه قدر اؤنملی اولدوغو هر کسدن داها یاخشی بیلیردی و عملده‌ده اؤز یاشامی و فعالیتلری بویونجا گؤسترمیش اولدو.

اوستاد حسن دمیرچی‌‌نین آیدین بیر نسلین سون نماینده‌سی اولدوغونو دا سؤیلمک زوروندایام. هئچ بیر سیاسی و تشکیلاتی یاپی‌یا عایید اولمایان و گئرچک آنلامدا بیرلشدیریجی بیر آغ ساققال کیمی تانینان اوستاد آرتیق آرامیزدا دئییل؛ بو آنلامدا آذربایجان کیملیگی اوغروندا بوتون قاتمانلاردا چالیشان انسانلاریمیزا بؤیوک سوروملولوق دوشور. حسن آذربایجانی بیر سیرا باشقا موسیقی و یا اینجه صنعت خادملریندن آییران اؤزللیک اونون قید شرطسیز بیر شکیلده یوردونا و انسانینا دریندن باغلی اولماسیدی. میللتینین تویوندا دا یاسیندا دا یانیندا ایدی. ان سون اؤرنگی ایسه ورزقان دفرمینده‌کی گؤستردیگی حساسیت ایدی. قوشقوسوز اونو باشقالاریندان آییران بو اؤزللیکلر سایه‌سینده هر زامان تورک میللتینین اورگینده یاشایاجاقدیر.

آذربایجان تورک میللتی‌نه سونسوز بیر سئوگی‌ایله باغلی اولان اوستاد حسن دمیرچی(آذربایجان) بو گون سون یولجولوغونا اوغورلانیر، تبریزین قیزیل توپراغی اؤز امانتینی سونسوزادک گئری آلیر.

یولو گئدرلی، یئری اوچماق اولسون.

ماناس چاملی- تبریز آراشدیرمالاری مرکزی اوزمانی

این متن را به اشتراک بگذارید

همچنین بررسی کنید

وزارت فرهنگ و ارشاد اسلامی و جایگاه ویژه آن در تداوم نظام شریعت اسلامی و پان فارسیستی در ایران (بخش سوم)- ماناس چاملی

(با تاکید بر شرح وظایف قانونی و مصوبات وزارتی و نهادهای زیرمجموعه) بخش سوم مؤلف: …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *